【Now財經台】老牌啤酒股香港生力啤(00236)股價今朝(29日)平開，開市僅15分鐘，股價已衝上1.4元，勁升40%，成交股數較過去100日同時段平均大增20倍，暫時成交金額逾100萬元。
生力啤業務主喺本港及內地，經營溢利分別按年增長71%及20%，公司昨晚(28日)出咗中期業績，收入按年增長3%，純利就按年增長31%至近5000萬元，略高於2023年疫後解禁後，顯著反彈嘅半年業績，期內，銷售成本下降，帶動主要經營指標有唔錯嘅表現，毛利率就進一步升至近40%。
不過，生力啤嘅派息政策相當保守，中期唔派息，要等到全年業績先派，股息率逾4厘。
睇返技術走勢，生力啤業績及股價已全面擺脫疫情期間嘅低迷狀況，今日借靠業績殺上逾4年高位，若下半年業績繼續保持呢個趨勢，股價可上望疫情前高位。
