【Now財經台】企業「抽水潮」未停過，最新有「周同學概念股」巨星傳奇(06683)，集團計劃以先舊後新方式，配售逾3750萬股，配股價9.13元，較上周五(25日)收市價折讓近20%，籌逾3.4億元。巨星傳奇股價懶理配股消息，今日(28日)一度炒高8.5%，高見12.38元，今次係公司第2次「抽水」，集團上次配股後1個月，股價累升40%，今次會唔會歷史重演？
《香港股票財技密碼》作者梁杰文指，唔會將市場今次反應解讀為正面，因為依家只係資金市嘅負面消息未影響到股價，今次集資規模唔算大，咁啱周杰倫近期宣布進駐抖音，令粉絲數量急增，令投資者睇到知識產權(IP)經濟有一定前景。
Mike又話，依家當紅藝人經濟潛力大，隨著內地消費改善，內需產品、新消費股都圍繞唔同IP推出，吸引唔少年輕人，周杰倫更可以話係IP「頂流」，但要留意，睇返巨星傳奇業務，有一半涉及健康產品、護膚品，唔係只做演唱會。
