【Now財經台】斥資約1.2萬億人仔嘅西藏雅魯藏布江下游水電工程項目，已經喺上周六(19日)正式開工，摩根士丹利估計，整個工程需時最少18年，水泥需求最多3000萬噸，預期水泥股會成為大贏家，其中，華新水泥(06655)因為業務地區主要集中喺西藏、上海、張家界等地區，比同業更有優勢，華新上周發咗盈喜，估計中期多賺最多61%，中長線而言，華新似乎會壟斷工程需求，華新股價今日(21日)一度飆逾1倍，高見20.1元，華新中長線能唔能夠維持強勢？
博威環球證券金融首席分析師聶振邦指，華新業績好難單靠呢項工程撐起，雖然工程耗時長，但由於唔係一次過買入所需嘅水泥，所以未必可以喺年度業績反映，但呢項工程會對公司形象有幫助，令公司更易接到其他水泥定單，如果華新成為主要供應商，亦都有助穩定未來生意額，但呢啲利好因素已經喺今日股價反映。
聶Sir又話，如果投資者喺14元以下買入華新，不妨考慮先「食糊」，始終唔確定升勢可唔可以持續，因為要視乎後續消息，如果喺約16元入手，可以再觀望多兩個交易日，如果企唔穩15元，先行離場可能較穩陣。
