【Now財經台】首程控股(00697)於周一(14日)除淨，呢段時間上車嘅投資者賺息又賺價，值得留意係，公司喺上周四(10日)及上周五(11日)，分別做咗1次大額回購，其中，上周四涉資逾3400萬元。投資者係咪唔使咁重視公司嘅回購動作，因為呢個情況好常見？
元宇證券基金投資總監林嘉麒指，首程喺回購過程中，展示公司手頭現金充裕，同埋有穩定嘅現金流，每股盈利亦穩定，集團轉型至今，派息絕對唔差，加上喺轉型初段中引入內地及日本大型基金，有基金支持之餘，盈利未來亦有可能出現爆發式增長，集團第1季盈利增長高達80%，係咪有機會炒埋盈喜概念，博發中期盈喜，股價再升多一浸，有短炒概念。
KK續指，投資者掌握唔到公司幾時分拆，亦唔知道投入金額及潛在可以升幾多，但喺猜測過程，會對估值及股價有幫助，雖然首程係國資委旗下公司，但都有一定炒味，如果短炒應該可以吸引資金留意。
