【Now財經台】美的置業(03990)今年上半年基本上冇乜成交，股價亦冇乜變動，不過，今日(15日)午後突然異動，仲價量齊升，股價一度狂飆60%，高見6.5元，RSI急升至80以上嘅極超買水平，更觸發市調機制須進入「冷靜期」。不過，升快亦回得快，收市時升幅收窄至14%，報4.63元，成交量較過去100日同時段平均激增65倍，全日成交金額逾6.8億元，非常罕見。
美的置業點解突然被資金睇中炒起，原因就好難搵到，但控股股東本身已持股81%，街貨唔多，單係北水已揸住近7%，股價係好易被舞高弄低。值得留意係，近排嘅異動股後續走勢都幾波動，似乎都唔適宜跟車太貼。
