【Now財經台】今個星期內地陸續有重磅經濟數據出爐，除咗今日(14日)打頭陣嘅進出口數據外，仲有全球關注嘅國內生產總值(GDP)、工業及固定資產投資等。今朝公布嘅6月以美元計價進出口數據都好過預期，但隨著關稅暫緩期之後完結，內地外貿表現會唔會打回原形？
恒生銀行首席經濟師薛俊昇指，內地6月外貿表現強勁，主要受惠於中美關稅戰進入「停火期」，唔排除在企業爭先落定單下，即使下半年有不明朗因素，都可以減低受影響嘅風險。
佢又指，雖然下半年應該不至於打回原形，但估計出口增長將會慢慢放緩，而關稅影響唔止限於出口層面，仲會影響工業生產、製造業投資，構成經濟下行風險。不過，內地自去年9月開始，已加大唔同政策嘅支持力度，其中，刺激內需亦見到成效，相信可抵銷外圍因素帶來嘅影響。
