【Now財經台】品質國際(00243)股價今日(11日)高開逾10%後，升幅一度擴大至逾1倍，高見0.43元，升上8個月高位，成交股數較過去100日平均激增270倍，暫時成交金額逾460萬元。
集團周二(8日)收市後公布配股消息，配股價0.16元，較收市價折讓14%，集資約920萬元，今次配股數量佔擴大後股本16%。
品質國際係老牌電子股，主要做電路板，仲有少數證券買賣及放債業務，但所謂證券買賣只係公司本身投資股票，唔係經紀或券商，依家持有6隻主要港股，但都唔係大價股或當炒股，整體投資組合約7000萬元，佔總資產約15%，似乎解釋唔到股價點解今日大升，公司唯一亮點係中期業績扭虧為盈。
睇返技術走勢，雖然股價今日一度倍升，但仲未重返去年10月初，內地推救市組合拳高位，即0.5元水平，未搵到今日爆升原因前都唔好亂買貨。
