【Now財經台】明日(9日)就係美國對等關稅(Reciprocal Tariffs)暫緩期死線，美國總統特朗普(Donald Trump)喺社交平台披露部分國家嘅關稅稅率，並將關稅生效日期推遲至8月1日，美國財長貝森特(Scott Bessent)就預告，未來48小時會有多項貿易聲明，市場會點反應？
星漢資產管理行政總裁王榮昆指，聽完佢哋嘅發言，感覺係4月2日至今，唔係太多國家想主動同美國傾，所以似乎依家美國想直接披露稅率，用嚟威嚇其他國家盡快埋枱傾，James認為，美國早前低估咗同咁多國家傾關稅協議嘅複雜程度。
James又提及，美國將對透過越南做轉運(Trans-shipping)嘅貨品徵收40%關稅，相信政策係針對中國，質疑中國透過東南亞國家「洗產地」，但中國曾表示，若有任何針對中國轉口、出口等政策，將會進行反制，或令成件事更複雜。
James表示，美股有「恐慌指數」之稱嘅VIX指數，作為一個較重要嘅風險指標，相比4月公布政策時急速飆升，今次只係微升，認為市場恐慌情緒冇咁大。
