【Now財經台】今年4月因為出唔到2024年業績需要停牌嘅茶葉股瀾滄古茶(06911)，公布業績後，今日(2日)成功復牌，股價輕微低開後，喺短短10分鐘內突然抽升85%，高見5.65元，但升幅好快收窄，收市報3.11元，僅升近2%，成交股數較過去100日平均激增254倍，但成交金額唔夠400萬元。
瀾滄古茶喺2023年底上市，當時被稱為「普洱茶第1股」，不過，只係短短年幾，已經要延遲1季出業績，仲要大走樣蝕3億元，股價長時間「潛水」，當年招股價10.7元，雖然今朝復牌曾彈高過，但公司前景始終都未見有太大改善。
