【Now財經台】小米集團(01810)將會喺周四(26日)發布新車YU7，股價橫行咗兩個月之後，今日(24日)終於出現突破，一度升4%，高見57.2元，YU7有冇機會好似去年SU7面世時，引爆股價新一輪炒作？
天風國際證券經紀業務部董事李偉傑指，上年推出SU7後，雖然產能線未能配合得到大量定單，但小米只係用咗約1年時間，就可以將交付量提升至2.9萬架，反映小米生產線成長速度快，並有足夠定單擴充產能，一定係好事。
Jason又話，今次YU7未必好快可以複製上次SU7發布時嘅行情，因為上一次發布SU7已經大幅price in咗，所以今次新車發布爆發點較細，但仍預期YU7可以為小米營業收入帶來增長，整體而言，股價仍有上升動力。
