【Now財經台】檸萌影視(09857)股價今早(24日)輕微高開後，開市早段較反覆，但好快喺成交配合下推升股價，一度大升逾17%，高見3.29元，成交股數較過去100日同時段平均增7倍。
由集團出品嘅新劇《書卷一夢》快將登場，將於周四(26日)登陸愛奇藝全網獨家播放，新劇僅2分鐘嘅預告片，推出1日已經有逾300萬人觀看，反應十分理想。
檸萌影視主要收入來自劇集版權，但單靠一套劇集好難扭轉經營困局，集團2022年上市至今已累蝕7億人仔，去年毛利率更大跌至約16%，差過內地同業，股價走勢亦反映咗呢個因素，股價上月曾創2.13元上市新低，今日重上3元樓上，算係有少少起色，但都講唔上係轉勢。
