【Now財經台】車企龍頭比亞迪股份(01211)正式拆細後，股價反覆回落，上日(19日)輪場比亞迪淡倉都有逾400萬元資金追入，不過，5日合計就有逾600萬元資金流出，反而好倉仍有1700萬元資金坐貨，如果投資者想博反彈的話，應該揀牛證定CALL條款？
法興銀行證券上市產品銷售部董事周翰宏指，比亞迪拆細後，股價走勢偏弱，目前120元水平除咗係100天線，亦係關鍵位置，造好嘅投資者要留意，股價一旦守唔住100天線，下個支持位就係110元，甚至係100元左右。
Horace又指，揀牛證要注意收回價唔可以揀得太進取，如果博股價跌唔穿120元，收回價要預至少10元距離，另外，佢建議怕收回嘅投資者揀CALL輪，行使價視乎投資者風險承受能力，短期條款方面，8月中到期，158至160元行使價，20%至30%槓桿都幾吸引。
佢續指，比亞迪近期走勢較弱，選擇上預咗要坐耐啲，博反彈的話，可以揀比較貼價，行使價135元左右，明年初到期，呢批CALL相對防守性會較強。
