【now.com財經】據《彭博》報道，騰訊控股(00700)又準備出手買嘢，今次睇中1994年喺南韓成立，同集團早已有長期合作關係嘅南韓遊戲巨頭Nexon，又話騰訊已經同Nexon已故創辦人金正宙嘅家族成員，埋枱傾緊收購嘅可能性。不過，騰訊及Nexon都冇就呢個報道作出回應。
Nexon係一家上市公司，但唔係在南韓掛牌，公司喺2011年在日本上市，係當年最大型科技股IPO之一。不過，呢單收購傳聞今日(13日)未有炒起騰訊股價，只係反覆偏軟，反而Nexon股價今日大升，一度高見2896日圓，大升10%，之後升幅收窄，收市報2850日圓，升8.3%，集團股價今年持續向上，今年以嚟累升逾24%。
摩根士丹利都睇好呢單deal，話如果消息屬實，除咗係一個雙贏，亦可進一步鞏固雙方現有嘅協同效應。
