【Now財經台】截至早上11時止，1小時內《彭博》用戶搜尋量最多港股，依次為中國生物製藥(01177)、地平線機器人(09660)、新城發展(01030)、紫金礦業(02899)及中國人壽(02628)。
中生製藥股價今朝(12日)喺巨額成交下飆升，一度抽升近18%，錄得2012年5月以來最大升幅，集團喺微博預告，1項標誌性嘅對外授權協議快將落實，又指已同多家藥企展開深入討論，涉及1款創新藥資產，並指對收入及盈利都會有幫助，不過，暫時未知涉及咩藥，但市場已咁大反應，現價仲值唔值博？
椽盛資本投資總監曾永堅指，近期持續有資金重投醫藥及生物科技板塊，中生製藥近日亦表明會加大發展創新藥嘅力度，希望佔未來兩三年總收益50%至60%，喺消息配合下，令中生製藥今日成追捧對象，但要留意，5元係一個重要技術位置，因為之前股價大跌時，呢個位置係最多蟹貨，如果可以企穩5元，就可以繼續向上。
