【now.com財經】泡泡瑪特(09992)股價今日(11日)下晝又破頂，一度高見269.6元，升逾4%，可能同摩根士丹利最新大幅上調目標價35%至302元有關，大摩又引述Google Trends數據，指集團旗下「吸金王」Labubu喺全球嘅關注度，已經同哈利波特(Harry Potter)、星球大戰(Star Wars)及迪士尼(Disney)睇齊，又估計集團有望成為全球增速最快嘅大型消費品牌。
呢個品牌嘅投資價值其實唔限於買佢嘅股票，Fans手上嘅心頭好，隨時成為世界級拍賣活動嘅天價收藏品。
據內地傳媒報道，今日一隻全球「只此一隻」嘅初代薄荷色Labubu，喺永樂2025春季拍賣會亮相，落槌價108萬人仔，買家成功買到心頭好之後，須支付相當於落槌價15%嘅佣金，即係超過10萬人仔，但有關方面拒絕披露買家身份。
此外，一Set名為《勿聽、勿視、勿言》嘅雕塑Labubu，之前喺香港蘇富比拍會亮相，拍賣前最高估價80000元，最終以20.32萬元成交，搶高逾倍。
