【Now財經台】蘋果公司(Apple Inc.)日前舉行一年一度嘅全球開發者大會(WWDC 2025)，會上介紹咗Apple Intelligence嘅新功能及框架，不過，投資者反應平淡，係咪因為人工智能(AI)技術上冇突破？值得留意係，Apple喺去年WWDC承諾將語音助理Siri同AI融合，但今次見唔到「AI版Siri」。
易方資本投資總監王華認為市場嘅反應合理，本身對今次WWDC冇太大期望，主要問題係硬件公司對生成式人工智能(Generative AI)相關硬件嘅思維唔一樣，Apple想交一份最完美嘅答案，但實際上已經比其他品牌落後。
佢又話，人用左腦或右腦思考會有差異，依家市場眼界比以前開闊，將重心擺喺未來技術嘅發展趨勢上，單單只有美觀已唔足以滿足市場，如果Apple持續冇突破，三星(Samsung)及小米集團(01810)可能會係更好嘅投資選擇。
