【now.com財經】人工智能(AI)晶片巨企英偉達(Nvidia)早前交咗份靚季績，上季盈收好過預期，數據中心收益更令人眼前一亮，刺激股價造好，雖然集團股價今年4月一度失守100美元關口，但之後逐步收復失地，依家已上返140美元水平，今年以嚟雖然升唔夠1%，但總算唔使跌，股價亦算企喺相對高位，令投資者及集團管理層有減磅誘因。
據《Barron’s》報道，Nvidia日前交畀美國證交會(SEC)嘅文件披露，行政總裁黃仁勳提交咗10b5-1計劃，擬出售600萬股Nvidia，計劃將會喺年底到期，但暫時未有出售任何Nvidia嘅股票，如果以前收市價計，呢批股份價值逾8億美元，折合逾62億港元。
黃仁勳對上一次沽貨係去年6月中至9月中期間，當時每股平均價118.8美元，套現逾7億美元。
