【Now財經台】金朝陽集團(00878)私有化交易告吹，拖累股價今日(26日)插水，計埋之前私有化失敗嘅復宏漢霖(02696)、利福中國(2136)及金利來集團(00533)，金朝陽已經係今年第4隻私有化失敗嘅股份，其實私有化其中一個較大誘因係股價長期低迷，點解接連有公司私有化失敗？對市場有咩影響？
《香港股票財技密碼》作者梁杰文指，利福、金利來、金朝陽都係香港及內地人較熟悉嘅公司，市場好清楚呢啲公司嘅投資價值，所以當私有化價格唔係特別吸引，就會令股東更加容易判斷應唔應該投贊成票，或大股東出價係咪合理。
Mike續指，另一原因係港股投資氣氛今非昔比，2022至2023年投資氣氛好差，所以當時好多公司成功私有化，不過，近半年港股已自低位大幅反彈，令市場感受到港股交投有改善，令小股東唔願意投贊成票。佢補充，其實今年私有化宗數同去年比較已經大減，相信主要係港股成交金額由低位回升。
佢又提醒，大股東要權衡輕重，因為當私有化失敗，過去嘅投資成本就變成徒勞無功，因此，如果要成事，或要接受比50%更高嘅溢價。
