【Now財經台】大唐黃金(08299)股價今日(22日)高開1%，已見了全日低位，之後愈升愈有，逆市走強，收市報0.215元，大升逾10%，全日成交金額逾2100萬元。值得留意係，股份近期持續強勢，已連升第14個交易日，累升35%。
公司主要從事黃金開採及黃金冶煉業務，截至去年9月底止，中期收入按年大升逾5倍，不過，由於要購買大量金精礦提煉純金，令盈利能力受壓，毛利率由49%急跌至9.3%，半年僅賺1420萬元，但總算向連續3個財年有錢賺嘅方向進發。
睇返技術走勢，大唐黃金已升穿保歷加通道頂，14天RSI已升至92嘅極超買水平，短線好大機會回調。
