【Now財經台】半新股正力新能(03677)股價今早(21日)平開後曾短暫向下，但買盤隨即跟進，午後一度高見9.97元，升6.7%，創上市新高，收市報9.51元，升近2%。
正力新能上市逾1個月，上市價8.27元，掛牌當日唔好彩撞正中美關稅戰升溫，上市第3日更一度「潛水」。不過，隨著貿易戰降溫，股價重拾動力，今日更借上市第2日嘅寧德時代(03750)持續強勢，以及半新股概念連升兩日，再破頂。
值得留意係，知名股評人David Webb最新喺佢個人網站發文，警告寧德時代H股流通量過低，依家H股僅佔整體股本3.4%，當中近半設有禁售期，要今年11月19日才解禁，股價易被舞高弄低，投資者炒影子股就要小心。
