【Now財經台】內地人工智能(AI)技術服務商第四範式(06682)昨日(15日)出咗營運數據，股價今日(16日)顯著造好，高開4%後，升幅一度擴大至逾10%，高見43.8元，衝上逾1個月高位，暫時成交金額突破4億元，成交股數較過去100日同時段平均增1倍。
第四範式昨日收市後，出咗上季數據，但冇公布純利呢條大數，收入及毛利潤都按年增長30%，毛利率按年企穩41.2%水平。至於外界最關注嘅AI相關開支，上季研發費增加逾5%，研發費用率就跌8個百分點。
目前，集團約70%收入來自旗下「先知AI平台」，相關收入按年大升逾60%，增速進一步加快。
睇返技術走勢，第四範式升穿由2月初高位，即63元水平引伸出嚟嘅下降軌，進一步回補4月7日嘅下跌裂口，今日暫時即市高位43.8元，距離裂口底部44.5元，相距不足1元，留意後市有冇力繼續向上，但公司依家仲蝕緊錢，而股價仍較招股價「潛水」超過20%。
