【Now財經台】日本Sony出咗業績，雖然收入按年跌2.9%，但純利按年增長17.6%。集團預期，盈利未來將會受貿易戰影響而下跌，依家Sony預測市盈率(PE)僅19.7倍，投資價值高唔高？
資深經濟師羅家聰認為，每隻股票及每個市場都有自己嘅玩法，相同倍數PE擺喺美股、港股及日股都有唔同解讀，所以唔能夠單憑公司PE高低判斷好壞。佢又話，由於日本早已被認定效率及生產力低，繼而令本質上PE上落被限制，因此，Sony預測PE約19.7倍未必係好平。
KC又指，中美貿易戰近日降溫，不過，就算貿易戰可以破局，關稅水平都唔可能重返美國總統特朗普(Donald Trump)展開第2個任期前水平，加上全球市場需求只係一般，以上各項因素都不利生產類型嘅出口股。
