【Now財經台】統一企業中國(00220)股價今日(9日)跑贏大市，高開3%後，升幅一度擴大至11%，高見9.97元，成交股數較過去100日同時段大增逾7倍，暫時成交金額約2億元。
集團出咗上季業績，首季稅後利潤按年增長逾31%，收入按年增長10%，毛利率亦有得升，好過預期，管理層指，有信心未來幾季毛利率都會向上，又估計全年銷售將錄得6%至8%升幅。
喺靚業績加持下，統一股價今日彈上10天線，並突破9.4元水平嘅雙頂阻力，依家全部平均線都係順排，反映股價強勢，業績後獲中金、高盛、富瑞等券商上調目標價，其中，以富瑞睇得最牛，目標價睇11.1元。
