【Now財經台】人民銀行、國家金監總局及中證監今朝(7日)再推出新一輪「救市組合拳」，其中，中國證監會主席吳清除咗講美國關稅政策、救市招數，同埋點樣鞏固內地市場回穩向好勢頭外，更罕有提到「股神」巴菲特(Warren Buffett)。
年屆94歲嘅巴菲特，喺巴郡(Berkshire Hathaway)派今年第1季成績表，同埋舉行股東會之後，突然宣布年底就會退休，吳清今日喺國新辦嘅記者會提及巴菲特退休時，佢話對方係好受大家尊敬嘅投資家，價值投資、長期投資、理性投資及努力回報嘅投資者，呢啲理念係唔會「退休」。佢又話，巴菲特退休後，時代會呼喚新嘅偉大投資家。
