【Now財經台】「五一黃金周」快將展開，內地餐飲市場將迎來消費高峰，龍頭之一海底撈(06862)宣布，截至前日(28日)止，全國門店「五一」假期首日預訂量逾2.5萬張枱，集團喺「五一」嘅表現係咪值得憧憬？
元宇證券投資總監林嘉麒指，預訂量的確令市場有憧憬，但要留意2.5萬張枱，相對於全國分店嘅佔比有幾多，以及消費者人均消費能否增加，因為消費者有機會透過唔同平台，並以優惠價格預訂，所以人均消費可能偏低。至於預訂數字能否持續至整個「五一黃金周」，暫時就無法估計。
股價方面，KK指，由於海底撈股價之前已經升至高位，所以「五一黃金周」訂枱數據未必對股價有好大刺激作用。
