【Now財經台】早前，美國總統特朗普(Donald Trump)炮轟美國聯儲局主席鮑威爾(Jerome Powell)，話佢遲遲唔減息，更一度威脅要炒佢，但1日後，但之後又改口話無意炒鮑威爾。市場以往都會聽住聯儲局委員嘅言論嚟估貨幣政策嘅走勢，估計聯儲局會幾時開始減息？
羅家聰指，現時唔少聯儲局委員都會對外發表個人睇法，但委員係各自表述，冇一個明確嘅共識或結論，加上近兩屆嘅聯儲局言論都好飄忽，講完好快又改口，令市場無所適從，所以市場依家唔會再理聯儲局委員嘅言論，直接分析經濟數據，從而得出結論，市場最新估計，聯儲局今年會減息2至3次，6月開始會減息。
KC又話，美國政府2月時炒咗唔少人，令4月、5月嘅失業率開始轉差，間接增加減息嘅機會，所以6月係有可能減息。
