【Now財經台】滙豐控股(00005)今日(29日)派咗第1季成績表，表現好過預期，加上宣布加碼回購最多30億美元，股價午後拗腰倒升，更愈升愈有，一度高見88.6元，升逾3%，由於去年同期有出售加拿大及阿根廷收益，但今年就冇出售收入幫補，上季純利按年跌25%，營收就按年跌15%，滙控股價午後倒升，係咪反映市場都收貨？
天風國際證券經紀業務部董事李偉傑指，除税前溢利及收入兩條大數都好過預期，撇除上年出售加拿大及阿根廷業務嘅收益後，都有唔錯嘅表現，睇返呢份季績，只有淨利息收益係差過預期。
Jason又指，滙控再宣布加碼回購最多30億美元，係多過上季嘅20億美元，喺今年中期業績前已經完成，主動性會更高，呢份業績好過預期之餘，亦維持到高回購、派息，所以完全合格，而股價已經反映咗呢個狀況。
展望第2季，佢就話仍然樂觀，不過，美國聯儲局減息步伐嘅不確定性，都對滙控有影響。另一方面...
