【Now財經台】日前公布新收購嘅毫子股泰凌醫藥(01011)，股價今日(29日)高開逾13%後，升幅一度擴大至36%，高見0.79元，衝上半年高位，其後升幅逐步收窄，中午前更倒跌，成交股數較過去100日平均激增約160倍。
集團昨晚(28日)公布收購浙江康源醫療器械58%股權，代價1.16億人仔，交易將以配股及發新股支付，配股價0.45元，較昨日收市價折讓22%，合共涉及2.74億股，佔擴大後股本約29%。
睇返集團業績，自2022年起因數據不足，核數師冇辦法對財務報表「表示意見」，去年情況仍持續，去年僅剩不足1000萬人仔現金，但總負債高達5.53億人仔。
睇返技術走勢，泰凌股價今早仍守到配股價，見到股價及成交喺消息公布前已出現異動，股價今日高開低走，同半年前喺高位當日走勢一樣，當時宣布向債權人發新股作債務重組，又係價量齊升，但公司及收購目標的基本因素都咁差，都係唔好掂住。
