【Now財經台】4月環球市場因美國發動貿易戰而經歷動盪，但目前美股由低位反彈，各個市場亦有回穩，個別市場甚至可收復失地，係咪代表貿易戰帶嚟嘅最壞情況已經過去？對於中美貿易談判最終結果會係點？
瑞士隆奧全權委託投資組合亞洲主管邵志銘指，暫時唔可以判決最壞情況已過去，市況仍然波動，市場普遍認為依家反彈係「死貓彈」，即大幅下跌後嘅小幅回升，所以現時唔係增持嘅時機，而係減持重倉嘅機會，美股係其中一個投資者重倉嘅市場，佢提醒現階段係減持美股嘅窗口，但減倉時要小心留意唔同板塊嘅走勢。
Jack又指，中美就貿易戰談判雖然仍有不明確因素，但認為美國對中國貨最終徵收嘅關稅會喺50%至60%嘅機會仍然大，因此，後市走勢要視乎逾50%關稅對經濟嘅實質影響有幾多。
另外，預測美國年底通脹大約3.2%，國內生產總值(GDP)預測由2%跌到1.2%，有滯脹(Stagflation)嘅風險，令美元同美債向下，美國資產變得唔吸引。
