【Now財經台】雖然港股今年跑贏外圍股市，但本港打工仔嘅強積金(MPF)投資表現唔係咁理想，以4月為例，暫時人均輸過萬元，係咪因為唔少資金流向美股？過去1個月，美國「股匯債3殺」，打工仔MPF資金流向有冇出現變化？
GUM常務董事陳銳隆指，過去幾年，市民可能對港股比較失望，去年有逾200億元淨流入美股，佔MPF總資產1.3萬億元約24%，如果美股同港股合計就佔近半，所以呢兩個市場都會對MPF表現有關鍵影響。
Michael又話，據資金流報告顯示，3月開始有逾50億元淨流出美股，但未見有大量資金流入港股，反而流入一啲避險資產及保守基金，整體趨勢呈兩極化，中度風險嘅資產有資金流出，轉投低風險保守基金或高風險股票基金。
佢又話，MPF有一啲固定入息資產，例如保守基金畀市民選擇，呢啲資產波幅同債券比較相對穩定，如果市民選擇債券基金，要小心波動性較大。
