【Now財經台】據《彭博》報道，喺美國總統特朗普(Donald Trump)宣布向大部分國家，暫緩執行關稅措施90日，刺激美股爆升前一日，共和黨聯邦眾議員，同特朗普關係密切，一直活躍於股市嘅格林(Marjorie Taylor Greene)沽美債，買入亞馬遜(Amazon)、黑石集團(Blackstone)及Tesla股票，睇返規定披露嘅財務報告，的確顯示格林分別喺上星期二(8日)及上星期三(9日)曾經進行過呢啲交易。
特朗普上星期三曾經喺社交平台發文，指「買入嘅大好時機已到」，大約3個幾鐘後，佢就叫停對等關稅(Reciprocal Tariff)，當晚標普500指數勁升逾9%，錄得2008年以嚟最大升幅。
民主黨議員已經要求調查，係咪有人趁對等關稅急轉彎時從中大有斬獲。
