【Now財經台】美國白宮最新聲明指，中國貨品面臨最高245%關稅，原因係中方報復，美匯指數續受制100關，金價就繼續破頂，今日(16日)午後一度迫近每盎司3300美元水平，喺避險資金不斷流入金市，加上美國聯儲局「放鴿」，金價可以升到幾高？
環球期貨交易所客席講師鍾俊鏘指，由於關稅談判仍然唔明朗，令避險情緒再現，加上全球對美元嘅不信任度不斷上升，各國央行紛紛以黃金取代美元資產。
Joe又話，依家黃金各方面嘅利好因素都比較強，睇返技術走勢，現貨金價暫時未有跟隨期金升穿3300美元水平，但由於上方唔係太多蟹貨及阻力位，暫時估計上半年有機會升至3500美元水平，但短期可能會有少少回調，但估計回落至3200美元水平會搵到支持。
