【Now財經台】雖然美國暫緩關稅90日，但市場嘅避險情緒仍然熾熱，加上美元轉弱，支持日圓最近持續強勢，美國及日本將會喺周四(17日)進行關稅談判，日本首相石破茂表明冇意用美債作為談判籌碼，日央行行長植田和男喺國會發言時指，美國關稅對全球經濟帶來好大不確定性，所以政策方面唔會有前設。高盛估計，若日圓轉強至130兌1美元，日央行可能會暫停減息，日圓最新迫近140水平，日圓仲有冇轉強空間？
ATFX亞太區首席分析師林銘添指，估計美日今次談判焦點會放喺停止加大徵稅幅度及範圍，亦要視乎日央行會唔會因應跟中國貿易來往頻繁，而提出針對性條件，若雙方可以達成共識，日本可享有較寬鬆嘅關稅待遇，日本經濟有望升溫，到時日圓有機會試140水平，雖然市場依家對中美談判睇法偏向樂觀，不過，一旦談判結果唔理想，日圓或要試145水平。
