【Now財經台】康師傅控股(00322)公布業績後，股價今朝(25日)一度逆市升5%，高見13.5元，衝上1年高位，但午後倒跌。集團去年收入近乎冇增長，但純利有得升，呢份全年成績表仲有咩亮點，又或者瑕疵？
信達國際研究部董事趙晞文指，康師傅去年純利略勝預期，收入就符合預期，收入近乎零增長，純利就按年增長近20%，原因不外乎成本下降及產品收入結構改善，從而令產品盈利能力提高。
晞文又話，公司經營現金流按年增約20%，但喺開支冇太大變化下，龐大嘅現金流能夠維持派息比率，因此，派息比率高達100%。
值得留意係，未來成本係咪可以維持喺低水平，集團可以把握機會大量採購低價原材料，有助提升今年毛利率。此外，亦可以留意產品收入結構，睇下飲品收入及毛利率會否進一步上升。
