【Now財經台】聯邦制藥(03933)今早(25日)低開4%後，跟隨大市跌幅擴大，一度大跌12%，低見14.62元，成交較過去100日同時段平均大增12倍，暫時成交金額近5億元。
聯邦制藥昨日(24日)收市後公布，將授予丹麥藥廠諾和諾德三重荷爾蒙減肥藥專利嘅獨家許可，並收取2億美元預付款項，以及最多18億美元潛在款項，金額大之餘亦反映集團研發能力。
不過，聯邦制藥股價今日不升反跌，除咗同大市氣氛唔好有關，亦因為有資金借好消息出貨，若以今年高位計，股價暫累升近40%，大幅跑贏恒生指數，但相信已反映咗唔少利好因素。
股價方面，14天RSI已經背馳咗一段時間，反映股價有調整壓力，今日更失守10天線，暫時喺20天線，即14.6元水平有支持，要留意後市守唔守得住。
