【Now財經台】藍籌國藥控股(01099)今日(24日)開市前出咗業績，收入按年跌2%，純利就按年跌22%至逾70億人仔，但差過市場預期嘅81億人仔，末期息大減22%至68分人仔，主要分部業務中，表現最差嘅器械分銷更由升轉跌，公司話同集中採購有關，其他業務就受醫保改革拖累，僅錄得微增長，再加上內地藥房近月爆倒閉潮，國藥股價喺業績後受壓，一度挫逾4%，低見18.58元，國藥業務前景係咪令人擔心？
博威環球證券金融首席分析師聶振邦指，國藥毛利率長期處於低單位數，反映盈利能力有限，唯有靠收入大幅增長去帶動盈利，但上述提及嘅幾個項目都睇唔到有明顯增長，中央亦未有推出相關政策幫一幫，所以業績差都係預咗。
聶Sir又話，國藥主要做傳統中成藥業務，競爭本來已經好激烈，加上陸續出現唔同創新特效藥，要維持藥房業務有一定成本，問題係市民買藥需求小，要持續營運對好大困難，如果關閉收入較低嘅藥房，雖然短期有機會影響盈利，但中長線有助公司發展及控制線上銷售成本。
