【Now財經台】創仔股盛良物流(08292)上周五(21日)收市後宣布，擬斥5000萬元收購以人工智能(AI)驅動嘅全球社交娛樂音樂平台V Sing全部股權，集團會發新股支付交易，發行價15.7港仙，較上周五(21日)收市價折讓約20%，消息刺激盛良股價今日(24日)一度飆1.3倍，而V Sing喺盛良嘅持股量升至近30%，躍升單一大股東，盛良會召開股東特別大會尋求通過議案，呢單疑似係「賣殼交易」嘅收購可唔可以成功闖關？
《香港股票財技密碼》作者梁杰文指，呢單收購性質上的確似賣殼，港交所對呢類交易一向有嚴格監管，雖然今次呢單收購存在灰色地帶，但仍符合規定，相信喺監管層面上可以輕易過關。
Mike又話，公司嘅物流業務持續錄得虧損，今次收購目標係從事社交音樂平台業務，本身有一定賣點，加上V Sing可以為用家提供舞台效果等，可以谷到流量，呢單deal會比到市場及股東新憧憬，盛良今次透過呢單交易提升知名度，然後再拓展業務。
