【Now財經台】積弱多年嘅英特爾(Intel)昨日(13日)委任陳立武(Lip-Bu Tan)出任新行政總裁，之前益華電腦(Cadence Design)喺陳立武帶領下，股價由不足6美元升至逾250美元，累升逾40倍，同期Intel股價僅累升4倍，今次陳立武「回巢」消息一出，Intel股價即急升逾10%，現階段追入風險大唔大？
Solomons Group亞太區投資及ESG總監黃耀宗指，因為之前益華嘅強勁成績表，加上陳立武嘅創科背景，令市場對佢好有信心，但值得留意係，依家嘅賽道已經唔同咗，益華嘅競爭對手未必有Intel咁多，所以依家好難用佢之前喺益華嘅成績作比較。
Andy又指，由於依家市場係對單一事件嘅憧憬，短期風險會比較高，Intel未來一兩季可能只係炒估值反彈，而喺商業角度睇，Intel未來嘅發展方向看似正確，因此，長期風險會比較低，亦較吸引。
