【Now財經台】遠大醫藥(00512)昨晚(12日)出咗業績，股價今日(13日)顯著上升，高開4%後，升幅一度擴大至逾16%，高見6.09元，衝上逾兩年高位，成交股數較過去100日同時段平均激增25倍，成交金額罕有逾2億元。
遠大今日價量齊升主要係交咗份靚業績，撇除匯兌因素後，收入按年增長約11%，純利則按年增長34%至近25億人仔，兩個數字齊創上市新高，而重點業務核藥抗瘤診療板塊去年收入更按年大升1.8倍。
近期醫藥股獲資金關注，遠大股價借靚業績爆上，但值得留意係，相對強弱指數(RSI)已開始超買，14天RSI升至77水平，遠大股價去年底借推出新藥炒上時，RSI曾升至80水平，依家已迫近當時嘅水平，加上6元整數關口前有阻力，唔排除要先行整固。
