【Now財經台】截至早上11時止，1小時內《彭博》用戶搜尋量最多嘅港股，依次為毛戈平(01318)、ESR(01821)、領展房產基金(00823)、長和(00001)及瑞聲科技(02018)。
毛戈平獲納入港股通，比較其他港股通「新貴」，醫療相關嘅方舟健客(06086)及同源康醫藥(02410)升勢凌厲，同樣近期上市嘅兩隻內需股小菜園(00999)、華潤飲料(02460)就先高後低，雖然毛戈平股價今日(10日)破頂後升幅收窄，但半日都keep住有得升，股價上市至今累升逾2倍，今日股價迫近「紅底」，依家估值達35倍，股價後市點行？
富昌證券聯席董事譚朗蔚指，毛戈平靠喺內地嘅知名度炒起，呢類半新股上方冇蟹貨，未有參考阻力，但留意上市至今仍未出過業績，所以股價冇明顯上升動力，未來要留意「解禁股」等因素有咩影響，雖然毛戈平短線急升，但唔建議現階段追入，但股價喺85元應該有支持。
