【Now財經台】異動股東江環保(00895)股價今日(10日)高開逾2%後，成交湧入，升幅一度擴大至24%，高見2.26元，升上近4個月高位，成交亦配合升勢，成交股數較過去100日同時段平均大增逾10倍，半日成交金額逾4600萬元。
主要做危險廢物回收及處理嘅東江環保今日(10日)喺大成交下急升，相信同公司上周公布，由旗下全資子公司華藤環境自主研發嘅一站式客戶服務平台環保慧診，佢嘅智能客服正式接入DeepSeek R1大模型。
DeepSeek橫空出世，港股乘熱潮大升，唔少股份只要一傳接入DeepSeek，就吸引到資金留意，東江環保並非首批藉DeepSeek氣勢帶挈股價嘅股份，但過往經驗反映大成交急升後，升勢都難以維持，加上公司業績一般，估計要連續3年蝕錢，高追風險相當大。
