【Now財經台】新濠國際發展(00200)股價今日(3日)裂口高開逾4%後，升幅一度擴大至逾16%，高見4.69元，升至今年高位，其後升幅收窄，成交股數較過去100日平均增2.5倍。
澳門2月賭收好過預期，日均博彩收入係5年以來最多，雖然摩根大通對賭股睇法樂觀，但維持新濠「減持」評級，指現估值較資產淨值有9%溢價，預期會有下行壓力，但股價照升。
睇返技術走勢，雖然新濠今日開陽燭，但上影線好長，升到100天線，即4.6元水平遇阻，呢個位置亦係去年9月中央推出政策「組合拳」後高位延伸嘅下降阻力，後市要留意澳門賭收會唔會進一步改善。
