【Now財經台】本港新股市場繼續熱鬧，重量級明星新股排隊交上市申請或掛牌，包括今日(3日)首掛嘅「雪王」蜜雪冰城母公司，「凍資王」蜜雪集團(02097)，股價今日一度炒高逾47%，如果抽中成功喺高位沽出，一手賺超過9500元，捧場客都應該收貨。至於電動車電池龍頭大廠寧德時代，早前有消息指已交咗港IPO申請，最新就有一直被指係「山寨周大福」，內地珠寶品牌周六福捲土重來。
周六福曾經多次申請喺A股上市都唔成功，去年曾向港交所(00388)遞過上市申請，但最終失效，集團原來已經喺上周五(2月28日)捲土重來，中金及中信建投做聯席保薦人，去年曾經有報道指，周六福計劃集資數億美元，估值超過100億人仔。
集團前身係深圳市周天福，由於個名同香港嘅六福集團(00590)、周生生(00116)及周大福(01929)好相似，因而引起市場關注，目前，李偉蓬及李偉柱兄弟係集團控股股東。
