【Now財經台】華寶國際(00336)股價今朝(3日)輕微高開0.4%後，升幅一度擴大至11%，高見2.3元，其後升幅收窄，中午收市報2.21元，升6.7%，成交股數較過去100日平均增逾7倍。
集團上周三(2月26日)收市後發通告，公布有關上海仲裁中心對農產品加工企業上海奕方老闆黃錦榮追數嘅進展，華寶大幅上調要求補償金額，由1年前大約3.3億元人仔，最新調高約1倍至6.36億元人仔。但由於奕方唔係上市公司，公司財務狀況、以及老闆黃錦榮嘅身家都暫時無從得知，加上上海仲裁中心早喺2023年8月已受理呢單糾紛，但至今仍未有任何裁決，市場對華寶能唔能夠成功收數存疑。
睇返技術走勢，華寶股價今日抽升，突破近3個月嘅橫行區頂，高位一度觸及250天線，但股價1年前都曾試過因追數通告而炒起過，但當日股價單日轉向，公司已預告會喺3月底業績時有更多披露，要留意埋股價今日下午會點走。
