【Now財經台】新股「凍資王」，有「雪王」之稱嘅蜜雪冰城母公司蜜雪集團(02097)，將於下周一(3月3日)掛牌，今日(28日)收市後就會有暗盤，入咗飛嘅投資者要睇實，如果抽到嘅幸運兒應唔應該快啲沽？冇入飛抽嘅又好唔好等上市後買貨？
博威環球證券金融首席分析師聶振邦指，睇返招股書截至去年9月底數據，對比返上市後股數，用今次上市價計，蜜雪每股盈利都有超過12元人仔，市盈率(PE)逾16倍，如果用茶百道(02555)及古茗(01364)昨日(27日)收市價計，PE分別逾18倍及逾22倍，蜜雪定價係吸引。
聶Sir又話，睇埋非酒精飲品板塊，行業平均PE 25倍，換言之，蜜雪合理值唔少於300元，依家招股定價202.5元，再配合市況暢旺，的確係有比較大上升空間，如果投資者考慮埋風險因素，若股價上市後唔高過240元可以考慮高追，但上到250至260元咁高水平，高追之前就要考慮自身風險承受能力。
