【Now財經台】以超低成本、高效能作賣點嘅國產人工智能(AI)大模型DeepSeek，推出唔夠1個月，已帶挈A股獲重估，推動內地股市指數，內地創新能力再度引起市場關注。有全球創新指數報告指，中國創新力排名持續上升，但呢類指數似乎同投資部署冇太大直接關係，睇好內地AI發展嘅投資者，應該點捕捉內地AI嘅投資機遇？
滙豐私人銀行及財富管理亞洲區首席投資總監范卓雲指，現時中資股估值及市盈率(PE)，相對於美股嘅標普500指數仍有落差，始終市場一直對內地AI發展偏向悲觀及審慎，不過，DeepSeek嘅出現令投資情緒轉向正面，亦令市場意識到內地AI行業將會迅速發展，預期未來幾個月將會有更多實際數據公布，令投資者有更清晰嘅部署方向。
她又稱，現時AI發展已進入新階段，即係著重AI應用普及化，依家已有逾百家A股上市公司接入DeepSeek，若企業能成功及持續地以AI技術帶動公司盈利增長，就可以提升估值，亦會吸引更多外資進場。
