【Now財經台】港股今日(21日)喺科技股帶領下升勢凌厲，衝上近3年高位，不過，昨日(20日)出咗業績嘅網易(09999)表現就比較差，早段一度逆市跌逾3%，午後逐步收復失地。網易上季純利超預期，但收入要跌兼差過預期。不過，大行仍力撐網易，摩根大通相信網易今年每股盈利可以獲得重估，摩根士丹利就指，網易新Game《界外狂潮》會喺今年3月6日全球上線，有望成為下個關鍵催化劑，網易股價係咪唔使睇得太淡？
紅蟻資本投資總監李澤銘表示，如果《界外狂潮》成功，將會對網易未來收入及股價有幫助，但短期嚟講，市場應該已price in咗，主要係《界外狂潮》去年已開始喺各大網絡平台做宣傳推廣，仲有大量推廣文章及試玩體驗，相信正式推出時應該會好hit，但火爆嘅情況能唔能夠持續，就要等玩家體驗過先知道。
Alan直言，《界外狂潮》推出初期係靠市場推廣催谷，但到底呢個Game吸唔吸引，就要等玩家玩過先知道，所以《界外狂潮》喺3月6日推出時，對股價嘅刺激作用未必會好大。
