【Now財經台】利福中國(02136)今日(21日)低開7.5%後，跌幅僅輕微收窄，股價續於0.74元至0.76元上落，成交股數較過去100日平均增5倍。
利福於去年12月獲主席兼大股東，人稱細劉嘅劉鑾鴻提出私有化，仲喺上個月提高咗私有化作價逾7%，由每股0.913元上調至0.98元。公司昨日(20日)舉行私有化法院會議及股東大會，雖然有約60%獨立股東投贊成票，但由於有近40%反對，達唔到通過私有化門檻嘅75%。
睇返技術走勢，利福股價今日大跌後，已跌穿所有移動平均線，重返私有化消息前水平，今次私有化失敗後，未來1年都唔可以再提私有化，利福股價喺私有化消息傳出前，曾低見0.5元至0.6元，後市要留意係咪要下試呢個位。
