【Now財經台】仙股環能國際(01102)今朝(7日)復牌，股價以暫時高位，大幅高開逾1.5倍，開市報0.169元，衝上近1年高位，暫時成交股數較過去100日平均激增逾百倍。
集團昨晚(6日)公布，現有多名高層等一致性行動人士，將會向獨立第3方內地民企浙江中南建設集團主席吳建榮出售合共逾49%股權，作價每股5仙，較停牌前收市價折讓24%，收購總作價約7200萬元，並會觸發全面要約，如果要買埋餘下約41%股權，最終收價價或逾億元。
值得留意係，中南建設係民企背景，又係最受內房拖累嘅建築行業，所以新主都未必可以畀到市場太大信心，加上要約價有折讓，到底對現有小股東有幾大吸引力都係未知數。
睇返技術走勢，環能今朝放完煙花後，開出一支大陰燭，值得留意係，集團停牌前股價大升兼成交急增，今日成交反而縮咗，明顯有「春江鴨」部署定，加上出通告前，其實港交所股權披露已顯示吳建榮入主，所以投資者應該唔會對昨晚份通告有太大驚喜，急升後散水都唔會太意外。
