【Now財經台】智雲健康(09955)股價今日(6日)大幅高開近15%後，升幅一度擴大至逾27%，高見2.05元，衝上4個月高位，暫時成交股數較過去100日平均激增33倍。
集團今朝開市前公布，今個月已將DeepSeek-R1模型接入旗下人工智能(AI)智雲大腦，進一步強化數據挖掘能力，提升公司醫院SaaS、藥店SaaS慢性疾病管理效率等。
智雲健康似乎前景唔錯，但其實2022年上市以來一直冇錢賺，只係蝕少咗，雖然有分析預期公司會繼續蝕錢，但如果業務進展順利，有望最快今年可以扭虧為盈。
睇返技術走勢，智雲健康昨日(5日)已偷步大升，仲突破100天線阻力，今日再裂口抽升，成交顯著增加，但陰陽燭形態反映高位獲利壓力好大，暫時形成一個「倒轉鎚頭」，亦留意上方嘅250天線，上市以嚟一直上唔到呢個水平，小心股價短期已見頂。
